ਬਾਗੀ ਪਾਨ ਸਿੰਘ ਤੋਮਰ ਤੇ ਬਣੀ ਫਿਲਮ..
ਪੁਲਸ “ਗੋਪੀ” ਨਾਮ ਦੇ ਬਾਗੀ ਨੂੰ ਲਾਲਚ ਦੇ ਕੇ ਨਾਲ ਗੰਢ ਲੈਂਦੀ ਏ..!
ਫੇਰ ਪਲੈਨ ਮੁਤਾਬਿਕ ਸ਼ਰਾਬ ਵਿਚ ਜਹਿਰ ਮਿਲਾ ਕੇ ਓਹੀ ਕੰਮ ਕੀਤਾ ਜਾਂਦਾ ਜਿਹੜਾ ਕਿਸੇ ਵੇਲੇ ਪੰਜਾਬ ਵਿਚ ਮੁਖਬਰ ਕਰਿਆ ਕਰਦੇ ਸਨ!
ਕਨਸੋਅ ਮਿਲਦਿਆਂ ਪੋਜੀਸ਼ਨ ਲੈਣ ਲੱਗਦਾ ਗਿਰੋਹ ਹੈਰਾਨ ਰਹਿ ਜਾਂਦਾ..
ਅਸਲੇ ਵਾਲਾ ਝੋਲਾ ਤੇ ਗੋਪੀ ਲੈ ਗਿਆ..!
ਫੇਰ ਮੁਕਾਬਲਾ ਸ਼ੁਰੂ ਹੋਣ ਤੋਂ ਪਹਿਲਾਂ ਨੱਸਿਆ ਜਾਂਦਾ ਗੋਪੀ ਪਾਨ ਸਿੰਘ ਕੋਲ ਬਚੀਆਂ ਸਰਫ਼ੇ ਦੀਆਂ ਗੋਲੀਆਂ ਦਾ ਪਹਿਲਾ ਸ਼ਿਕਾਰ ਬਣਦਾ!

ਵਾਹਿਗੁਰੂ ਕਰੇ ਦਿੱਲੀ ਮੋਰਚੇ ਵਿਚੋਂ ਉਪਜਿਆ ਕੋਈ ਗੋਪੀ ਬਚ ਕੇ ਨਾ ਨਿੱਕਲ ਜਾਵੇ!

ਨਿੱਕੇ ਹੁੰਦਿਆਂ ਗੱਡੇ ਤੇ ਆਉਂਦਿਆਂ ਡੰਗਰਾਂ ਦੇ ਜੂਲੇ ਦੇ ਕੋਲ ਹੋ ਜਾਣਾ..!
ਥੱਲੇ ਜੁਟੇ ਡੰਗਰਾਂ ਨੇ ਸਿਰ ਸੁੱਟ ਖਲੋ ਜਾਇਆ ਕਰਨਾ..
ਬਾਪੂ ਹੁਰਾਂ ਆਖਣਾ ਕੁਝ ਗੱਡੇ ਦੇ ਮਗਰ ਚਲੇ ਜਾਓ..ਡੰਗਰ ਸੌਖੇ ਹੋ ਜਾਣਗੇ!

ਦਿੱਲੀ ਦੀ ਵੀ ਏਹੀ ਆਦਤ..
ਹਾਵੀ ਹੋ ਗਏ ਵਿਰੋਧੀ ਨੂੰ ਰਾਸ਼ਟਰਵਾਦ ਦੇ ਜੂਲੇ ਹੇਠ ਲੰਘਾਉਂਦੀ ਏ..
ਓਹੀ ਰਾਸ਼ਟਰਵਾਦ ਜਿਸਦੇ ਅਸਰ ਹੇਠ ਠੇਠ ਪੰਜਾਬੀ ਬੋਲਦਾ ਹੋਇਆ ਇੱਕਦਮ ਹਿੰਦੀ ਤੇ ਆ ਜਾਂਦਾ..!

ਇਨਬਾਕਸ ਆਉਂਦੇ..
ਤੁਹਾਨੂੰ ਬਾਹਰ ਬੈਠਿਆਂ ਨੂੰ ਕੀ ਪਤਾ..ਅਸਲੀਅਤ ਦਾ..
ਜੋਗਿੰਦਰ ਯਾਦਵ ਵਰਗੇ ਮਿੱਠ-ਬੋਲੜੇ..ਸੰਘਰਸ਼ ਨੂੰ ਕਿਦਾਂ ਦਗਾ ਦੇ ਸਕਦੇ?

ਜੁਆਬ ਹੁੰਦਾ..ਮਿੱਠੇ ਮੇਵੇ ਵਰਗੀ ਮਾਂ ਦੇ ਹੁੰਦੇ ਹੋਏ ਪਿਓ ਉਸਦੀ ਸੌਂਕਣ ਲੈ ਆਵੇ..ਦੁੱਖ ਤੇ ਹੁੰਦਾ ਏ..!
ਅਤੀਤ ਵਿਚ ਧੋਖੇ ਵੇਖੇ ਹੰਢਾਏ ਨੇ..
ਭਰਾ ਨੂੰ ਭਰਾ ਦੀ ਮੁਖਬਰੀ ਕਰਦਿਆਂ ਵੇਖਿਆ..
ਮੂਹੋਂ ਮਿੱਠੇ..ਸ਼ਾਂਤੀ ਦੇ ਪੂਜਾਰੀ..ਪਰ ਅੰਦਰੋਂ ਧੋਖਿਆਂ ਦੀ ਸੁਨਾਮੀ..ਵਿੱਸ ਘੋਲਦੇ..ਕਿੰਨੇ ਬਾਦਲ ਬਰਨਾਲੇ ਬਲਵੰਤ ਹਰਚੰਦ ਵੇਖੇ..
ਚੁੱਪ ਚੁਪੀਤੇ ਚਿੱਤੜਾਂ ਥੱਲੇ ਸੱਪ ਵੀ ਮਾਰ ਆਏ..ਭਿਣਕ ਤੱਕ ਨਹੀਂ ਪੈਣ ਦਿੱਤੀ!

ਅਗਲਿਆਂ ਮਜਬੂਤ ਕੜੀਆਂ ਪਹਿਲਾਂ ਹੀ ਲਾਂਬੇ ਕਰ ਦਿੱਤੀਆਂ..
ਅਖ਼ੇ ਗਰਮ ਬੋਲਦੇ ਨੇ..ਮੰਚ ਦੀ ਮਰਯਾਦਾ ਭੰਗ ਹੁੰਦੀ..ਏਡੇ ਵੱਡੇ ਮੋਰਚੇ ਨੂੰ ਸਾਂਬਣਾ ਕਿਹੜੀ ਸੌਖੀ ਗੱਲ..?
ਏਨੀ ਗੱਲ ਯਾਦ ਰੱਖਿਓੇ ਸਿਧਾਂਤ ਤੇ ਸਮਝੌਤੇ ਕਰ ਕੇ ਪ੍ਰਾਪਤ ਕੀਤੀ ਵੱਡੀ ਜਿੱਤ..ਗਲ ਵਿਚ ਫਸਿਆ ਕੰਡਾ ਸਾਬਤ ਹੋਵੇਗੀ..!

ਦਿੱਲੀ ਬਾਰੇ ਮਸ਼ਹੂਰ ਹੈ..
ਪਹਿਲਾਂ ਚੰਗੀ ਤਰਾਂ ਭੰਡਦੀ ਏ..ਫੇਰ ਓਥੇ ਮਾਰਦੀ ਏ ਜਿਥੇ ਪਾਣੀ ਵੀ ਨਹੀਂ ਮਿਲਦਾ..
ਸਮੁੰਦਰ ਪੀ ਕੇ ਡਕਾਰ ਤੱਕ ਨਹੀਂ ਮਾਰਿਆ ਜਾਂਦਾ..
ਇਸਨੇ ਅਤੀਤ ਵਿਚ ਸੱਪ ਵੀ ਮਾਰਿਆ ਤੇ ਸੋਟੀ ਵੀ ਨਹੀਂ ਟੁੱਟਣ ਦਿੱਤੀ..!

ਲੰਮੀ ਲੜਾਈ...

ਵਿਚ ਜੇ ਕੋਈ ਚੀਜ ਬਚਾ ਸਕਦੀ ਏ ਤੇ ਉਹ ਹੈ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਤੇ ਆਸਥਾ ਅਤੇ ਚੜ੍ਹਦੀ ਕਲਾ ਦੇ ਸਿਧਾਂਤ..
“ਭਾਈ ਮਤੀ ਦਾਸ ਗੁਰੂ ਦਾ ਪਿਆਰਾ..ਮੂਹੋਂ ਸੱਤਨਾਮ ਬੋਲਦਾ..ਤਿੱਖਾ ਸੀਸ ਉੱਤੇ ਚੱਲਦਾ ਏ ਆਰਾ…ਮੂਹੋਂ ਸੱਤਨਾਮ ਬੋਲਦਾ”

ਬਟਾਲੇ ਲਾਗੇ ਪਿੰਡ ਸਰਵਾਲੀ..
ਓਥੋਂ ਦਾ ਕੰਵਲਜੀਤ ਸਿੰਘ..ਪੁਲਸ ਜਿੰਨਾ ਤਸ਼ੱਦਤ ਕਰਦੀ..ਅੱਗਿਓਂ ਓਨਾ ਉੱਚੀ ਵਾਹਿਗੁਰੂ ਦਾ ਜਾਪੁ..ਅੱਜ ਸ਼ਹੀਦ ਹੋਏ ਨੂੰ ਤਕਰੀਬਨ ਤੀਹ ਸਾਲ ਤੋਂ ਵੱਧ ਦਾ ਸਮਾਂ ਹੋ ਗਿਆ..”ਵਾਹਿਗੁਰੂ” ਪੱਕਾ ਹੀ ਨਾਮ ਨਾਲ ਜੁੜ ਗਿਆ..!

ਅਗਲੇ ਜਾਣਦੇ ਨੇ ਕੇ ਜੇ ਕੱਲੀ ਧਰੇਕ ਛਾਂਗੀ ਤਾਂ ਸਮਾਂ ਪਾ ਕੇ ਪੱਤੇ ਤਾਂ ਨਿੱਕਲ ਹੀ ਆਉਣੇ..
ਸੋ ਆਰੀ ਸਿਧੀ ਜੜਾਂ ਤੇ ਹੀ ਫੇਰੋ..ਟੈਟਾਂ ਹੀ ਮੁਕਾ ਦੇਵੋ!

ਸੰਤਾਲੀ ਦੀ ਵੰਡ ਤੋਂ ਕੁਝ ਮਹੀਨੇ ਪਹਿਲਾਂ..
ਲੰਡਨ ਇਜਲਾਸ ਵਿਚ ਗੋਰਿਆਂ ਨੇ ਨਹਿਰੂ ਦੇ ਨਾਲ ਗਏ ਸ੍ਰ ਬਲਦੇਵ ਸਿੰਘ ਨੂੰ ਕੰਨ ਵਿਚ ਆਖਿਆ ਕੇ ਬਾਕੀਆਂ ਨੂੰ ਮੁੜ ਜਾਵਣ ਦੇ..ਤੂੰ ਦੋ ਦਿਨ ਹੋਰ ਰੁਕ ਜਾ..
ਤੇਰੀ ਕੌਮ ਦੇ ਭਵਿੱਖ ਬਾਰੇ ਕੋਈ ਜਰੂਰੀ ਗੱਲ ਕਰਨੀ ਏ..!
ਭੱਜਾ-ਭੱਜਾ ਨਹਿਰੂ ਕੋਲ ਗਿਆ..ਅਖ਼ੇ ਗੋਰਿਆਂ ਨੇ ਇੰਝ ਆਖਿਆ..
ਘੋਗਲ-ਕੰਨੇ ਨੇ ਅੱਗਿਓਂ ਬਾਂਹ ਫੜ ਲਈ ਅਖ਼ੇ ਸਾਡੇ ਨਾਲ ਹੀ ਵਾਪਿਸ ਜਾਵੇਂਗਾ..!
ਨਾਲੇ ਬਿਆਨ ਦਿਵਾ ਦਿੱਤਾ..
ਗੋਰਿਓ ਸਾਡੇ ਮੁਲਖ ਵਿਚੋਂ ਦਫ਼ਾ ਹੋ ਜਾਵੋ..ਹੱਕ ਲੈਣੇ ਹੋਣੇਗੇ ਤਾਂ ਆਪੇ ਕਾਂਗਰਸ ਕੋਲੋਂ ਲੈ ਲਵਾਂਗੇ”
ਤੇਹੱਤਰ ਸਾਲ ਹੋ ਗਏ..ਅਜੇ ਤੱਕ ਉਡੀਕੀ ਜਾਨੇ ਹਾਂ..ਊਂਠ ਦਾ ਬੁੱਲ ਕਦੋ ਡਿੱਗੂ..ਅਖ਼ੇ ਵੇਲੇ ਦੀ ਨਮਾਜ..ਕੁਵੇਲੇ ਦੀਆਂ ਟੱਕਰਾਂ!

ਕਨੇਡਾ ਦੀ ਸੱਚੀ ਘਟਨਾ ਏ..
ਅਫ਼੍ਰੀਕਨ ਨੇ ਮੀਟਿੰਗ ਮਗਰੋਂ ਪਿੱਛਿਓਂ ਜੈਕਾਰਾ ਛੱਡ ਦਿੱਤਾ
ਹੈਰਾਨ ਹੁੰਦੇ ਨੇ ਪੁੱਛਿਆ..ਭਾਈ ਤੈਨੂੰ ਇਹ ਸਿਖਾਇਆ ਕਿਸ ਨੇ ਹੈ?
ਆਖਣ ਲੱਗਾ “ਤੇਰੇ ਵਰਗੇ ਇੱਕ ਪੱਗ ਵਾਲੇ ਵੀਰ ਨੇ..ਆਖਦਾ ਸੀ ਇਹ ਜਿੰਨਾ ਉਚੀ ਤੇ ਲੰਮੀਂ ਅਵਾਜ ਵਿਚ ਲਾਇਆ ਜਾਵੇ..ਰੁਕੇ ਹੋਏ ਕਾਰਜ ਓਨੇ ਹੀ ਜਿਆਦਾ ਰਾਸ ਆਉਂਦੇ ਆ”

ਚੜ੍ਹਦੀ ਕਲਾ ਵਿਚ ਰਹਿਣ ਦਾ ਐਡਾ ਸੌਖਾ ਤੇ ਸਟੀਕ ਇਲਾਜ..!
ਆਓ ਫੇਰ ਅਸੀਂ ਵੀ ਫਤਹਿ ਦੀ ਸਾਂਝ ਪਾਈਐ..”ਬੋਲੇ ਸੋ ਨਿਹਾਲ..ਸਤਿ ਸ੍ਰੀ ਅਕਾਲ”

ਹਰਪ੍ਰੀਤ ਸਿੰਘ ਜਵੰਦਾ