Sub Categories
ਆਵੇ ਸਮਝ ਨਾ ਸਮਿਆ ਖੇਡ ਤੇਰੀ,
ਰੁਕਿਆ ਕਦੇ ਨਾ ਜਦੋਂ ਦਾ ਦੌੜਿਆ ਵੇ।
ਡਾਢੀ ਤਾਂਘ ਹੈ ਖਾਸ ਪ੍ਰੇਮ ਵਾਲੀ,
ਡਾਢਾ ਡਾਢੇ ਨੇ ਜਾਂ ਫਿਰ ਕੌੜਿਆ ਵੇ।
ਅਟਕੇਂ ਜ਼ਰਾ ਨਾ ਕਿਸੇ ਵੀ ਖੁਸ਼ੀ ਮੌਕੇ,
ਲੰਘ ਜਾਂਵਦੈਂ ਝੱਟ ਤੂੰ ਸੌੜਿਆ ਵੇ।
ਰਤਾ ਦਬੇਂ ਨਾ ਕਿੱਡਾ ਵੀ ਕਹਿਰ ਹੋ ਜੇ,
ਬੇਪਰਵਾਹ ਮਿਜ਼ਾਜ ਦੇ ਕੌੜਿਆ ਵੇ।
ਧੀਰਜ ਰੱਖਦੈਂ ਸਿਰਜਣਾ ਕਰਨ ਵੇਲੇ,
ਵਿੱਚ ਪਲਾਂ ਦੇ ਭੰਨੇਂ ਹਥੌੜਿਆ ਵੇ।
ਲੋੜ ਵੇਲੇ ਨਾ ਸੱਚਿਆਂ ਨਾਲ ਚੱਲੇਂ,
ਰੋਕਣਾ ਬਦੀ ਤੋਂ ਬਦ ਨਾ ਔੜਿਆ ਵੇ।
ਨੇਕ ਰੂਹਾਂ ਨੂੰ ਕਰੇਂ ਪ੍ਰਤੱਖ ਮਗਰੋਂ,
ਮੌਕੇ ਝੂਠਿਆਂ ਨੂੰ ਦਵੇਂ ਭਗੌੜਿਆ ਵੇ।
ਆਉਂਦੇ ਪਲ ਦਾ ਭੇਤ ਜਸਵੀਰ ਨਾਹੀਂ,
ਲੰਘਿਆ ਪਲ ਨਾ ਪਰਤ ਕੇ ਬਹੁੜਿਆ ਵੇ।
ਜਸਵੀਰ ਸਿੰਘ ਪਮਾਲ